العلاقات

عياو ما يصبغو في هاد الزريبة ولكن لوانها هما اللي كاينين: الأحمر والخضر. هزي عينيك للسما يا مراكش يا الحمراء وطلبي السما تسمح ليك على فعايلك. باب دكالة، فين كاينة المحطة والحمام ومالين الكتوبة تايبيعو العلم، كانو تايحرقو فيها الخونة ديال الاستعمار. جامع الفنا، عامر بالتوريست، إنعاش الاقتصاد. كانو تايشنقو فيها شحال هادي الناس ورجليهم لتحت تاتركلو، والناس جالسة تاتاكل وتضحك وتتفرج. الأحمر ديالنا، الأحمر ديال الدم، ما كاين غير الدم في هاد الزريبة هادي. هزو راسكم للسما شوفو واحد النجمة شحال زوينة، هي اللي تاتصبرني في هاد الليل، راهي صغيرة مضوية، الله على ديك النجمة. هازها معايا في قلبي واخا حمار راه كانحس، واخا حمار راه عندي مشاعر الخ….زيت على حالة.

الوهم اللي لبستو ولا لجام.. وكيفما قالوا: الحب صعيب والولف مصيبة، حيت الولف كايتحول لصبر.. الصبر اللي كايدبر، ويخليك تقبل العذاب والقهرة ويديك حتى للقبر. وعلاش صبرت؟ حيت ثقت فيه وقلت دابا يجي النهار اللي غادي يتبدل فيه. بالحق كيفما كذب علي، حتى أنا كذبت على راسي، وكنت كانسمي الذل اللي عايشة: "صبر". حياتي بحال هاد الطاحونة.. ديني بين يديه، وهو المسؤول عليها، وهو هو غادي في جهة جارها، وأنا في الجهة الأخرى. وخا الجلد غليظ، بالحق ولا بحال شي خريطة ديال الندبات، كل جرح فيه قصة. حياتي ولات بحال هاد "الفراكة".. كانفيق على الصداع وكانعس على الوجع. وليت كانميز نوع الدقة غير من الصوت قبل ما توصل لحمي. هاد العنف ماشي غير في يديه، العنف في ديك الشوفة اللي كايشوف في بها. وليت بحال شي حفرة لتفريغ الغضب. وأنا اللي كانضل في تمارة، ونهز الثقل، وناكل الدق من الفوق، وفي اللخر أنا اللي خاصني نطلب السماحة! كان كايصحاب لي غادي نكون رفيقة الدرب.. لقيت راسي رفيقة العذاب. وكل نهار كانحس بالثقل كايتزاد علي.. ثقل الهضرة القاصحة ديال هاد الحمار. وقفت معاه في كلشي، رديت الشوك ورد، ورديت المرار عسل.. ومازال هو هو. ولكن راه عييت، وتقطع في النفس.. بحال إلا غارقة في "الغيس" حيت ثقيل على صدري. غارقة في الظلمة لدرجة ما بقيتش نشوف الطريق اللي قدامي. وليت نخاف من الراحة، كانخاف من النهار اللي ما يعنفنيش فيه، حيت كايجيني بحال ذاك الهدوء اللي قبل العاصفة. بالحق العنف كايجرح اللحم وشوية الثقة.. ولكن الروح؟ الروح باقة حرة، وباقية كانشوف في السما واخا الحافر غارس في الطين. آه غرقت في هاد المحنة، ولكن هاد الغرق ما قتلنيش.. ولكن علمني نتنفس تحت الما. وماشي حيت خايفة منه، حيت تربيت على الكلمة هي الكلمة وعلى الوفاء. هو ما عارفش بلي الصبر عند "الحرة" بحال العافية: يا تدفي الدار، يا تحرق اللي ما عارف حقها! والكتاف اللي هزو الهم سنين، قادرين ينفضوه في لحظة.

هاد العام كانو المشاكل في الفلوس في الزريبة، ولكن هانية، راس العام قرب وهاك القصير والناس تاتخرج، ونديرو شي راس عام مجموعين، نديرو شي بوناني عشرة، تسعود، ثمنية، سبعة، ستة، خمسة،ربعة، تلاتة، جوج، واحد.. بوناني! وإنعاش الخزينة العامة. شرب يا الحمار شرب، وسكري يا الحمارةسكري، وسير وسير.. بزاف ديال المشاكل. تاتسمعو "العلاقات" كلشي تايتخلع، ولكن هما أعز حاجة عندنا حيت تاتكون عندهم علاقة مع الناس اللي تانبغيو وتانخافوهم يمشيو. حيت في العلاقات تانشوفو شكون تعلق، شكون تقلق، شكون تزلق، شكون تفلق، شكون طلق، شكون طرق.. وسير وسير. تانخافو على هادوك الناس لا يمشيو ويخليونا، حيت كاينة الموت، حيت كاينة الفلوس، حيت كاين الجوع، حيت كاين الحماق، حيت كاين الخوف، حيت كاينة العقد، حيت كاين السم. وديك اللي ڤاع ما تانعرفو ندوِيو عليها، اللي كاين فينا وما تانقدروش نسميوها، هي اللي تاتخرجنا لهاد الدنيا وحنا ما تانقدروش نخرجها من فمنا، هي اللي تاتخرج في الطبلة وتاتولي كلشي حشومة، واللي تانجبدوها بالفرنسية باش نڤولو "سيكس" (Sexe) ونجبدوها بالعربية باش نڤولو "النكاح".. كاينة المشاكل! هادشي علاش اليوم تلاقينا عند هاد المعصرة هادي، وتجمعنا باش ندورها مجموعين ونخرجو منها الزيت. ولكن زيتنا اليوم ماشي غير دوغماتولوجيا، وسيكسوا ليتي ونكاح.. كاينين علاقات وحدين خرين تايجمعونا في هاد الدنيا، كاينين العلاقات اللي طوال. أطول علاقات هما العلاقات اللي تايجمعوني مع صاحبي ولا مع صاحبتي، علاقات ديال الصداقة، تايتكونو "پيغ" (Pure)، تايتكونو روحانيين، تايتكونو واقعيين، تايتكون ما فيهم لا فلوس لا سيكس لا حتى شي حاجة. ولكن وخا هكاك تايخسرو هاد العلاقات هادو، واليوم ندورو عليهم هاد المعصرة ونعرفو علاش وفين تايخرجو. مي أهم من هادشي، المعصرة إلا دارت، حيت الواحد تايضرب تانڤولو في المغرب "حمار الطاحونة" تايْدَوّر المعصرة. هاداك خدام في الشركة، اليوم بغينا ندوِيو على "الصلارية" (Salariat)، بغينا ندوِيو على الناس اللي مكرفصين في الشركات، بغينا ندوِيو على الناس اللي ما عندهم صوت، وكايدوّرو هاد المعصرة ديالهم، تايْكونو حمار وحمارة ديال الطاحونة حيت عندهم ولادهم في الدار وخايفين عليهم، حيت واحد خايف على مرتو، ووحدة راجلها مريض وخايفة عليه.. وسير وسير وسير. حمار طاحونة يذكر الجمهور بقواعد الزريبة جهة القمر: دعم الفرد والدولة هي المسؤولة/ جهة الشمس: دعم الدولة والفرد هو المسؤول.